اول يوم فى الدراسة

السلام عليكم ورحمة الله ..
 حاليا بعد ما اتروقت وصحيت من النوم بعد محاولات فاشله لايقاظهم ليا
بس فى النهايه قمت براحتى برضه .
جالى صداع وظهرى قام عليا تانى ويظهر جالى "دسك"
دماغى مقلوبه آوى ودا عشان نايم بعد المغرب وصاحى بعد نص الليل
فالطبيعى اقوم مدروخ كالعادة .. دا بقه ادمان ماشاء الله اصلا
ماهو هاعمل ايه كنت تعبان وهلكان ومش نمت من امبارح
استنى لما يغمى عليا يعنى ولا ايه ..؟
كان لازم انام واللى يحصل يحصل
بس امبارح اللى كان النهارده من اربع ساعات كدا
كان يوم مش عادى ،مش عادى خالص
يعنى ماعشتش يوم زيه بقالى يطلع كداااا ...
امممم اللهم صلى ع النبى قول يجى اسبوعين كده
اصلهم كانوا الاجازه بتاعت نص السنه ^_^
فالواحد لازم يفك عن نفسه بقه شويه مش ممكن كده
مش لاقى وقت استريح فيه من كتر التعب بتاع اليوم دا
دا قضى على استراحه الاجازه كلها ، كده هاضطر استريح اسبوعين كمان
عشان اعرف استعيد النشاط من جديد وتكون ساعتها الدراسه بدأت :D

اصل ماقولكومش الدراسه هنا  مش العميد ولا وزير التعليم العالى اللى بيقرر تبدأ امتى فيه
لا ابسلوتلى ، هما يقرورا زى ماهما عايزين .دا على نفسهم يا بابا
انما احنا نجى فى الوقت اللى احنا عايزينه فى اليوم اللى احنا عايزينه
ولو حبكت فى المكان اللى احنا عايزينه كمان 
آآه  سيطره احنا طبعا ..
 بس مش عارف كله بيفقد السيطره دى ايام الامتحانات ليه
الناس دى خايفه كدا ليه ..؟ ماكنتش اعرف انهم جبناء اوى كده
حته امتحانات مش عارفين يسيطروا فيهم .. جاتكوا خيبه
من حق الدكاتره بقه يطعلوا عليكم العقد بتاعتهم
 وكل واحد ينجح ويسقط اللى هو عايزه
ماهو لاقينكوا شوخشيخه وطلعتوا  ارانب ونفخ ع الفاضى

ع العموم نرجع تانى للى كنت بقوله .. فكرنى كده يا اسمك ايه الله يكرمك
آه آه ان النهارده ماكنتش يوم عادى
 وتعبت فيه اوى لدرجة انى مضطر استريح شهر كمان ..
انا قلت شهر..؟!
مين قال شهرين انا فاكر انى قلت تلات اشهر تقريبا
ماتغلطنيش بقه واسمع وانت ساكت
هو انا هلاقيها منك ولا من البيت ..جاتكوا القرف
ياض اسمع بقه ، انت رغاىّ كده ليه
اسمع بس ،بص اقولك اصلك هاتستمتع اوى دى ولا حكايات  على بابا والالفين حرامى
شوفت اديك غلطّتنى اهو اسمها الاربعين حرامى
بس اربعين دا ايام ما كان سكان العالم تلاته مليون اربعه
انما دلوقت ممكن تلاقى مليون من سكان الارض هما ذات نفسهم  حراميه
المهم بس عشان ماتهوش وتهوهنى معاك

اليوم دا كان 9 فبراير ..يااااه اسعد يوم فى حياتى !!
وهاقولك ليه ..بس اصبر بس وبلاش تقعد تنفخ كده وانت قاعد
وبعدين لو زهقان ماتقوم تروح ،انت جاى تتضايق هنا يعنى
 شفلك اى مترح تانى ، يالاقوم  ياض من هنا ، عيال فرافير

المهم سيبكوا منه ،المهم انتوا ماتكونوش مضايقين
اصل ازعل وماكملش اللى حصل واقعد اضغط فى نفسى بقه
واقول انى غلس ورغاىّ وبضايق الناس 
بس انتو طبعا مش هاترضوا تخلونى اعمل كده فى نفسى
 مش كده ولا ايه ..؟
فين صحابى القمامير اللى خايفين عليا ..؟
محدش رفع ايده ليه..
ايه دا مفيش حد من صحابى طلعوا قمامير خالص !
يا خساره !!..المهم ما علينا

بصى يا ستى وبـــصّ يا زيــــدى ..
النهارضه اللى هو امبارح من اربع ساعات دا
ماكنتش نمت وفضلت صاحى
وعملت كل حاجه ماكنتش بعملها قبل كدا
رحت استحميت الصبح وحضرت الفطار واكلت
وقعدت ع الجهاز شويه وخلصت حاجات وشوية نت
واستنيت لما الظهر أذن وصليت ومشيت
طبعا كل دا بالنسبه للبشر شئ عادى ،بس هو بالنسبالى مش عادى ابدا !
لان النهار فى قاموس حياتى بالنسبالى معدوم
واصل النهارضه كمان  اللى هو من اربع ساعات دا
عشان ماقرفكمش  كل شويه بالجمله دى
كان اول يوم دراسه حسب تعلميات وقرارات الوزير
واللى هى زى ما قلت مالناش دعوه بيها
روحت بقه وقلت افك عن نفسى شويه وابطّل قعدة البيت
اللى قاعدها بقالى اسبوعين دى
واللى شغال مشاوير  فيها تصليح للمخروب اللى اسمه الكمبيوتر
دا غير النت اللى عايزين نجيبه ودايخين عليه ومش عارفين نثبت على قرار فيه
وهاتك على كده رايح جاى رايح جاى
وساعات لما مش الاقى مشوار ، اروح عامل مشوار واطلع برا برضه
بتخنق انا من قعده البيت ،هو احنا مخلوقين عشان البيت ،قعدة البيت ليها ناس تانيه ياعم
انما انا بحب اطلع برا عالطوووووول
عشان كدا رغم ان ماكنش فيه داعى انى اروح الكلية
 زى 99 وتسعه من عشره من طلاب الكليه ما عملوها
ورغم الحاح البيت وهى الحاح مش اصرار برضه يعنى انى ماروحش
قلت بقه عليا الطلائع بالتلاته  لرايح وخلاص
رغم انى عارف انى مش هلاقى اى شئ ولا الهواااا

بص يا برنس انا ربنا رزقنى "بتوك توك" فاضى بعد البيت بشويه
ولان اننا لازم نمشى شويه كده عشان نوصل للكوبرى بتاعنا
فالحمد لله الشويه دول  ربنا نجانى منهم  بتوصيله زى الفل
التوك توك خدنى وودانى ع كوبرى "المحمودية "
الكوبرى الذى لا يغيب عنه "القفله"
تلاقى اربع عربيات رايحين وقصاد منهم خمشاشر عربيه جايين
واتفرج بقه وشوف مين اللى هايعدى الاول
بس انصحك ماتطوّلش عشان ما تتأخرش على مشوارك
الفرجه بس  للى فاضى وموراهوش حاجه وعايز يتسلى
الطريق ماكنتش قافله اليوم دا على غير العادة
او قول يعنى فى الوقت اللى عديت فيه بس اللى ماكنش قافله
عشان الدقة والوضوح والشفافيه ..

وخدتها مشىّ لحد ما جبت جرنان وبعدين ع الموقف
هى مسافه طويله حبتين وحسيت انى ماشى الى مالانهايه فى لحظة ما
بس متعّود عااادى منا ياما مشيت
صحيح كنت باخدها بالتوك التوك برضه
بس عشان نزلت ع الكوبرى بقه قلت خلاص قضيها ماشى احسن
وقبل الموقف قابلت حد اعرفه وصديق ليا على الفيس
ماشفتهوش من زمان .. وكان بيتكلم فى التليفون
هو بالاحضان بقه وشويه كلام وسؤال كدا وبعدين سبنا بعض لكل واحد يكمل طريقه
وركبت العربيه وتلت ساعه كده ولقيت نفسى فى قلب دمنهور
فى منطقه  اسمها "المستشفى العام "
اللى بتلاقى عندها الاتوبيس وحد عمال ينادى ويقول " تعا ,مششفا مششفا.."
وتلاقى كإن جمهور النادى الاهلى بيقتحم الاتوبيس
 وزقّ وخش يا جدع واوعى ياست وبالراحه يا افندى
واللى عبال ما اروح بلاقى اتوبيسين اتلموا ومبقاش فيهم مكان حد يقعد فيه
طبعا التبّاع هايقولك تعالى يا استاذ ،تعالى يا آنسه
ماتصدقهوش لانك هاتقف طووول الطريق جوا الاتوبيس
 وهاتبقى عرضه للسرقه والزحمه والخنقه واحيانا للتحرش
بس دا مش كتير ، اتوبيساتنا متربيه والحمد لله
هى معاكسات بس وخلاص ، حاجه عادية ماتقلقوش آوى كده يعنى
الناس الرايقه والمريشة بقه  بتقضيها تاكسى عالطول ومابتدورش بلا اتوبيس بلا بتاع
وبصراحه  الاتوبيس دا ماعدتش بحب اركبه
غير لما بلاقيه فاضى او معايا حد هايركب ويكون فاضى برضه او فيه مكان
غير كدا يامعلم ، اوّدعك وغدا القاك

انا مشيت ومش عارف ايه حكايه المشى معايا النهارضه للكليه
ويا سلااااااام .. دا ايه دا ، ايه الانبهار دا
الكليه زحماااااا ، انا عمال وانا بخش اخبط فى الناس !!
والسلم بقه يا لهوووى انا تقريبا زحفت فوق الناس عشان ادخل جوا منه
 وحاجه يعنى فظيعه
امة لا اله الا الله قدام الجدول واللى عمّال يصور واللى عمّال يكتب
وطبعا الجدول منور الحيطه وملوى هدومه !!
هو هايفضل كدا اسبوع كمان بس
بعد كده بقا هاروح اقرا عليه الفاتحه ..لانه تقريبا والله اعلم ومتهيألى كده
انه هاينتحر ويضحى بنفسه ... بالذوق او بالعافيه
وهايبقى محتاج عمليات تجميل من الاقلام اللى هاتعلّم عليه
إشى قلم جف وقلم رصاص وقلم  حبر  ،كل انواع المطاوى  ^_^
وعشان الفلانتين بقه وكل سنه ومالناش دعوه بيه
هتلاقى اللى واخده جايبه لحبيبته هديه !
واهى تبقى إثبات على اهتمامه بالمستقبل اللى هايكون بينهم كمان

كتبت الجدول بالعافيه من الزحمة اللى موجوده طبعا !
وبعدين طلعت الدور التانى .. ويارتنى ماطلعت
اطلع من سلم للسلم والخ الخ ,,وطيخ طاخ طوخ ومبسوط يا بابا آدم
ومبسوطه يا ماما حوا ..
انا دخلت برجلى قصدى طلعت يعنى برجلى اليمين  وعينك ما تشوف الا النور
نظام ايه وحضور ايه .. كان نفسى وكاله الانباء تيجى ترصد الحدث المهم دا بصراحه !!
وتكتب عن تفانى الطلبة فى جهودهم نحو تحقيق العلم وبناء المستقبل
لدرجة انى فى نفسى أخذت قرار انى ماروحش الكليه دى الاسبوع دا خالص مره تانيه
واهو اسيبهم شويه يشمّوا هوا من غير ما اتقّل عليهم واقيد حريتهم
اصل الطلبه غايه الانظباط الصراحه  .. انا بقولهم يا اخوانا اتحلحلوا شويه  ،مش هاينفع كدا
امال هاتعيشوا حياتكم بعد كده ازااااى
العيال قطط مغمضه ، مش ناقص غير انى اجيب كل واحد واعرفه يعمل ايه !!
حاجه صعبه , ولا الطالبات بلاش الطلبه دول مقدور عليهم بكلمتين
بس الطالبات تعمل معاهم ايه ..؟
غلبت افهم فيهم ان الانغلاق دا مش مفيد للى فى سنكم
مفيش مانع من شويه تعامل وحربة  ،الدنيا مش حرب يعنى
وبلاش اللبس الواسع اوى دا ، انتوا طايقينه ازاااااى ؟!
وبعدين الشباب متربى اهو وزى الفل  وهما ايجابيين وهاتلاقوا فايده من التواصل معاهم
وكله بما يرضـــــــــــــى الله ..

انا زهقت من كتر النصايح وتعبت لحد ما صوتى خلاص بقيت مش قادر
حتى "ميرندا" ماعملتش معايا ,,وتعبت بطنى اكتر .. هى كانت مضروبه ولا ايه ..
وطبعا من الزحمة مقدرتش !!
وصحابى اللى قابلتهم كلهم والحمد لله  وقضينا يوم زى الفل اوى يعنى
واللى محضرش ولا واحد فيهم ..!!
انا بعد كده مشيت
 تاااانى هو المشى دا ورايا ورايا.. انت ايه حكايتك ..:D
 دمنهور زحمااا كالعادة ومش عارف اعدى خالص
مش عارف ايه حكاية الزحمة دى كمان
اللى مش لاقى مكان اروحه بسببها !!

بس لو انتوا مركزّين معايا ومش تهتوا فى وسط الكلام
انا لسه ع فكره ماقولتش ليه اليوم دا مش عادى خالص
اصل شفت الشمس  وحسيت بحرارتها وانى ماشى فى الشوارع بالنهار عااادى
وانى يعنى اتحركت وبقيت حر ولفيت شويه كده  وعملتها نزهه
بصّوا اولا مافيناش من شتيمة لاننا محترمين
انتوا شوفوتونى شتمت حد فيكم دلوقت .. ها ؟
يبقى نلّم نفسينا بقه ونحفظ ادبنا
وبعدين ياأخى انت ايه اللى خلاك تقرا الكلام يعنى
محدش والله غصبك ع ايدك وقالك اقرأ
قال يا قاعدين يكفيكوا شر اللى عايزين يقعدوا ..حاجه تغيط ياراجل
هو انا اصلا مش عارف اليوم دا مهم فى ايه بالنسبالكم
انا قلت بالنسبالى فى الاول ، فكنتوا تاخدوا بالكم بقه
ويلا بقه عشان شكلى يمكن اروح انام من التعب اللى حصلى
بعد ما قمت من النوم دا ،،يااااه خمس ساعات صاحى ليه ..؟
ان لبدنك عليك حق ..كده هابوظّ اللياقه اللى انا فيها
خلتونى اقعد اكتب واتأخر ع معاد النوم ..
يآآآآآآآه ( تثاؤب) ..تتمسوا على خير  بقه .. يقعدلكوا بالعافيه ..