كلمتين ع الماشى
احترت كتير فى انى اوصف الحلم اللى ماحلمتوش
او اللى مانكتبش انه يكون على ارض الواقع
اكتفيت بس انى اتخيل نفسى شئ تانى
او بمعنى اصح فى دنيا تانيه غير اللى انا فيها
الرضا بالنصيب شئ على قد ما بيريح
على ما اوقات بيتعب
بيتعب مش اعتراض عليه
انما اختصارها فى امنيه كان نفسك تحقق
بنشوف القدر بيبقى بأختيارنا اوقات
واوقات تانيه بيجى عليا من غير ما نحسبها
بس فيه حاجات حلوة برضه فى الدنيا بنحمد ربنا عليها
حتى كانت مؤقته وهايجى يوم وتروح
ويمكن دا اللى بيتعب اكتر
الدنيا بالنسبالى زى الحرب
اللى بالنهار ووسط الاحداث والناس
ببقى شادد اوتار اعصابى وتفكيرى واستعدادى لاى شئ ممكن يحصل
رغم ان دا واقعيا مش بيحصل بالدرجه دى
ولما بكون لوحدى وبرتاح
بتكون الراحه زى المخبأ او النفق او المعسكر
اللى بيستريح فيه الجندى بعد الحرب
بس لو الدنيا ماهياش حرب امال تبقى ايه ..؟
وابسط مثال انها كده ان فيه دائما صراع
بين اللى عايزه وبين اللى مفروض عليك
تفتكروا هى عباره عن ايه ..
وايه معنى الوقت فيها
يمكن لو عشنا الدنيا بنظره تانيه هانحس بحاجات تانيه
ويبقى معنى الدنيا مختلف
بس دا مش ممكن يحصل لان فيه حواجز كتيره
لا اراديه او طبع اتطبعت عليه من زمان
وعشان يتغير مش ممكن يكون ابدا لوحدى ....
مش لاقى تفسير لحالات الحكمه
اللى بتهبط عليا دى من حيث لا ادرى
بقول لو انا كده بعرف اجيب معنى ونظره لكل حاجه بفكر فيها ..
امال مش عارف اغير نفسى ليه ..؟
المثل اللى بيقول "ايد لواحدها ماتسقفش "
يمكن انغماسى فى احساس الشئ اللى فات وعدى
اكتر من اللى ممكن يكون موجود
يمكن حاسس ان ربنا مش هايدينى
لانه شايفنى ماستحقش
رغم انى بحكيله كتير وبدعيله
ولسه فيا بقعه كويسه ماتلوستش ..
ويمكن ربنا بيدينى درس ازاى اعيش الدنيا
واتعود على كل شئ صعب فيها
عشان قدرة تحملى تبقى اكبر
لمواجهه حاجات لسه ممكن تيجى اصعب بعدين
بس لما تحس انك عايز تعمل هدنه مع كل شئ
وتنفصل عن كل شئ ارتبطت معنوياتك بيه
عايز ربنا يفرحك بحاجه تصبرك
وتغطى هموم جواك مالهاش قرار
ياريت اعرف اوصلها عشان احلها
وياريت اعرف اتجنبها وابعدها عنى للابد
بس لا عارف اعمل دا ولا قادر اعمل دا ...
كل اللى بعرف اعمله احيانا انى اسخر من نفسى
ومن الهموم والمشاكل
او اعممها وانى مش لوحدىبس اللى فيها
لا دا فيه كتير بس انا اللى مش شايف
ومعرفش جوا كل بنى ادم فيه ايه
انا ماعنديش اعتراض انى ابقا شايل هم جوايا
لا خالص انا عايز بس اعرف اتعامل معاها بحرفيه
من غير ماهى تأثر عليا
انما انا اقدر اتحكم فيها بالشكل اللى يرضينى ..
احيانا الانسان اللى مش شايل همّ جواه
غالبا مش بيقدر نعمه بين ايديه
لانه ماجربش خسارتها
وممرش بتجارب تخليه يفكر فيها بنظره اشمل من اللى كان شايفها
بس النظرة البدائيه لكل حاجه ليها طعم مختلف
لما تعيش حاجه لاول مره
من غير ما تعرف عواقبها ونتايجها بعد كده
زى احساس الطفل اللى ماسك لعبه جديده
هو لوحده اللى بيلعب بيها ..
عشان كدا فرحه العريس والعروسه
ليله دخلتهم بيفتكروها فى البدايه معنى للجواز
وبعدين لما بتروح وبيعدى وقت
بتلاقى الهموم والشكاوى طلعت
ومابتبفاش نظرتهم ليها زى زمان بعد كده...
لما تحس انك وانت مرتاح فيه حاجات تاعباك
وصداع نفسى وشرخ كبير فى عماره آيله للسقوط
حاجات ماتعرفش ايه حلها
ولو فكرت تلاقى ليها حل برضه مش هاترتاح
مش عايز تفكير يبقى رد فعل
انما عايز شئ يحصل يودينى لحل المشكله
ان المشكله نفسها تتحل مش انى اعملها ستاره
واحجب عنها الشمس ...
تفتكروا ممكن يحصل دا ..
وتفتكروا الفتره المظلمة
اللى مهما بيحصل مش بشوف النور فيها
ممكن يجى يوم فعلا وتنتهى ؟َ!...
كل لما اكون بالحاله دى
مابعرفش غير انى اقول كلمه واحده
كلمه نفسى ربنا يسمعها منى بجد .... "يارب"....
ردحذفكل الأفكار والمشاعر دى شرحتها بفلسفة وطريقة فظيعة
انت من الناس اللى بتقدر تكتب اللى جواها بطريقة بسيطة وتشد أوى وفى نفس الوقت عميقة بتخليك عايز تقرأها كذا مرة عشان تستوعبها
مش عارف أرد أقول ايه .. بس احتمال بنلاقى شوية راحة لما بنعرف اننا مش وحدنا فى الدوامة دية .. أصل كلنا كده .. بدرجات
يارب
ربنا يخليكى
حذفاسعدنى تعليقك آوى
واسعدنى احساسك باللى كتبته
كلمه يارب كلمه اشمل من كل الكلام
ولانها مستوى مافيش بعديها كلام
نورتى المدونه مروه :)