مشكلتى مع المشاكل


مادة الاحصاء رغم انى لا بحبها ولا بطيق الدكتور /الدكتورة  بتاعها  ولكن بحب مذاكرتها آوى
حالة غريبة كده  لما تبقى مش طايق مادة بس بتحب تذاكرها جدا مع نفسك
 يمكن عامل القدر مخلى برضه فيه مسافة نفسية عباره عن شحنات متضاربة بينى وبينها
يمكن عشان ذكريات قديمة مرتبط بيها من ايام 67% نسبه النجاح
واللى مش عارف حظى الوحش ولا غباء من الاخريين اللى خلانى  من 33% الباقيين !

بشوف المادة  دى دايما  عبارة عن شوارع تايهه وداخلين  فى بعض
شبه  كده عندنا لما تدخل ع شارع المنشيةوبعدين  تلاقى نفسك  بعد شويه فيه فى شارع الثوره
رغم ان الشارع دا فى وادى والتانى فى مكان تانى خااااالص  ، خريطة متلغبطة كده على بعضها
ماتعرفش اولها كان ايه ولا آخرها فين ..(المنشيه والثوره ..شوارع المدينه عندنا)
يعنى مثلا ...
الجذر التربيعى لمعامل "اف" الذى يتم مقارنته بمستوى مجتمعين من خلال وسيط التبادل
المنعدم والفرض الاخر الغير قابل للانعدام  والذى يتصل فى النهايه بنتيجة لاحدى الطرفين
فى التوزيع المتباين  لمجموعه من العينات المتخذة من الفرض المعين ... حد فاهم حاجه؟!!
 دا ايه الحلويات دى كلها .. هو اللى عمل الاحصاء دا من كوكب ايه .. بنى آدم زينا كدا ؟!
كان عايش  يعنى وبياكل وبيروح الشغل  وينام ويخرج زي الناس   .. ولا كان مهاجر فى جزيرة لوحده
دى كلها  عباره عن افترااااضااااات وبعدين تقوم تطلع منها بنتيجة حسابيه للواقع .. ازاى.. مش عارف
(البروبليما)  بقه مش انى مش عارف ازاى تتحل انما فى القوانين نفسها  اتعملت اصلا ازاااى ...؟!
الناس دى على اى اساس ومبادئ صنعوا القوانين دى ..كانوا بيفكروا ازاى ..؟!
طب  لو مثلا محاسبة وقوائم وميزانيات  نقول عارفينهم  فى اى مكان فيه مرتبات 
الاقتصاد والبنوك والبورصه بنسمع عنهم  فى نشرةالتاسعه ..
انما الاحصاء دى بتاعت ايه بالظبط وعلى اى واقع  ممكن نتعامل معاها ...؟!
اهو كلللل اللى قولته دا كان مثل ( لمشكلتى مع المشاكل )
انا عارف المشكله بتيجى ازاى..
بص ، غالبا بتحس ان فيه حاجه نغضّت عليك عشتك وعملت خلل فى وظيفه التفكير
تخليك تقعد مركز تفكيرك فى شئ واحد بس وباتجاه معين وسايب بقيت الاتجاهات
زى الكشّاف  كده اللى فجأة يقوم ثابت على مكان واحد بالاضاءه وسايب بقيت الاماكن
بتستهلك وقت اطول من اى حاجه تانيه يوميه بتتعامل معاها
واكبر مشكله فى المشكله انها بتسحب الوقت ، وهى غالبا بتتقاس كده
كل ما يزيد الوقت ويطول كل ما فرصه الحل تقل وتزداد رقعة الاحباط
 وتركيب عقدة من الشئ صاحب المشكله وتشوفها  حاجه كبيرة وضخمه
  ومكتوب فوقيها.... (إوس 15 )..... ماهى احصاء بقه  ^_^

فن التعامل مع المشاكل فعلا  مش سهل ،ولكل مشكله وليها حل ومفتاح غير التانى
 ممكن تلاقى مشكله واحده بحلين مختلفين مع الناس وممكن برضه تلاقى حل واحد لمشكلتين !!
المرونه دى بقه هى العامل الاخر بعد الوقت فى تعريف الاثار الناتجه عن المشكله
مش المشكله نفسها ودا لان  المشكله بذات نفسها ملهاش وجود فى الواقع  اصلا
انما هى لغه فى العقل لما تلاقى قدامك مانع او سد للوصول لشئ
واللفظ اللغوى "شكل ،تشكيل " يعنى له حجم ومساحه طبيعية فى التعامل
بس بيكون دائما باشارة سلبيه للمخ واشارات عصبية بالزهق والتوتر والخوف..وهكذا
ودى اشارات رد فعل طبيعية لا ارادية ضمن الكتالوج النفسى لكائن حى يدعى "الانسان"
الصنعة هنا بقه  انك تقدر  تتحكم فى ردود الافعال
 اللى هى لا ارادية وطبيعية وغريزة عند الانسان دى   شوف ازاااى ....
اللى بتعمل ضغط وهروب من المنطق ونظرة الحياة العادية بتتغير لاوضه متر فى متر
 ومكان بتشوفه حواليك عباره عن ظلااااام وفجأة تبقى عايز تفض  نفسك من كل حاجه
بيحصلنا كده لما نواجه مشكله وكل ما حجم المشكله كان كبير كل ما الاعراض دى زاد تأثيرها
 اهو انا بقه نفسى اتعلم  الصنعه دى ، ومستعد ادفع نص عمرى واعرفها  ومش عمرى كله طبعا
يعنى  على الاقل طيب  الاقى وقت اطبق فيه اللى اتعلمته  امال هاطبقه مع عزرائيل بقه ولا ايه  ...؟!

المهم  ان هى دى مشكلتى  اللى لو اتحلت مش هايبقى فيه مشكله فى اى مشكله
عند الاحصاء بعرف اذاكرها واحلّها بس يمكن  مش فاهم ولا عارف مبنيه على ايه 
هى بتبقى مجرد خطوات وقوانين وامشى عليها وبس
 شويه حسابات ظريفة  كده  ماتعرفهاش غير لما  تقعد تفهمها  الاول 
نفس الموضوع بقه ، الحكايه انى عايز اعرف  اتعامل مع المشكله ذات نفسها
مش  مثلا انى احلها وبس ، لا  انما الخطوه اللى بتعرف منها تسيطر على الدائرة المغلقه اللى بنحس بيها ساعتها
التركيبه ذات نفسها  اللى ما تخليش وجود اى مشكله يعمل مشكله .. فاهمين المشكله ؟!
اتمنى كلامى ما يكونش عامل مشكله ، وتقدروا تفهموه من غير مشكله
وتعرفوا ازاى نتعامل مع المشكله لو حصلت مشكلة ونحل مع بعض المشكله دى..

الحل اللى وصلتله من وجهه نظرى هو
عامل الهدوووء النفسى وبرود الاعصاب وان ولا يكون فى بالك خالص
تتعامل مع المشكله  كده معامله بالمثل
مش هى جايه تعكنن عليك حياتك يبقى نعاملها بنفس المعاملة ،خليك  كده غلس وغتيت !
بس دا غالبا حل نظرى اكتبه فى الامتحان لو اتسالت فيه
بس عمليا الناس مش كدا ،لانهم مش ضاربين الدنيا جزمة زى حضرتى
او فيه  ناس تانيه عندهم اصلا  حلول تغنيهم عن وجود عنصر المشكله من قبل ما تبدأ
بس يا ترى بقه الناس اللى فى النص  دى تعمل ايه؟!
نفسى  اصحى فى يوم ملاقيش عند الناس المشكله دى
تفتكروا مثلا  هانبقى عاملين ازاى  ..يعنى لو كل واحد فاهم يعمل ايه لو حصل مشكلة
احتمال السنجة والسكاكين والرصاص ينقرضوا على المدى الطويل
والكلام نلاقيه يتباع فى السوق من ققلة الكلام، والناس تشتريه لان معدش حد بيتكلم عن المشاكل
تخيلوا كدا كم الراااااحه النفسيه اللى هاتبقى موجودة
انك تبقى  فاهم ان اللى قدامك هايتعامل مع المشكله ازاى زيك بالظبط
مش هاتحتاج لــ..28 حرف بمعدل 30  فى الثانيه عشان يفهم
ولا 60 على الثانيه عشان يفكر  ولا 120 على الثانيه عشان يطبق اللى وصلتم ليه
ودا بقه لو طلعت حى ترزق بعد جلسه المباحثات دى !
عشان كدا الموضوع دا  باعتبره مشروع امن قومى  المفروض يدرسوه فى المناهج بشكل عام
واكاديميات الشرطة  والجيش بشكل خاااااص
والقنوات الفضائيه لا بشكل عام ولا خاص انما بشكل اساااااااسى ..
يااااه لو المشكله دى اتحلت ،يمكن مش هتلاقوا كلمه مشكله فى القاموس تانى بعد كدا ...!!


تعليقات

إرسال تعليق

المشاركات الشائعة من هذه المدونة

مذكرات ( نقطة البداية )

لم أعد كما انا، وأكثر ما يزعجني انقطاعي عن الكتابة فترة طويلة جعلتنى لا أعود كما كنت قديما ولا حتى أصبح بامكاني البحث عن فكرة، اصابنى الجمود، حاولت ولكن في كل مرة أشعر بكلماتي فاقدة الإلهام وانها مجرد كلمات فارغة! جٌل ما اكتب عنه هو ما اشعر به داخل نفسي ، ربما افتقد للخصوصية فى كتاباتي بمعني ان اكتب بحرية دون وجود حد او خوف من ان شخص ما يقراً فلا يعجبه الكلام ، ان اكتب لنفسي فقط ومن اجل نفسي فقط ، لا داعي لتنسيق الكلمات او تنميق الجمل ، لا داعي اصلا لوجود شعور انني كاتب وان ما اكتبه مهم فهو ليس مهما علي الاطلاق اكتب لنفسي وربما انسي اننى كتبته من الاساس بعد ذلك ، مجرد ضغط او زفير كاد يتحول الي اختناق من كثرة الكتمان داخلي او لاني ذو شخصية انطوائية فلا احب احد ان يعلم اسراري او يفكر فيها من منظوره الخاص كانت اول مرة يقرا لي احد ويهتم علي ما اتذكر فى منتدي اسرة كانت تدعي اسرة شبابنا ، كان لديها منتدي تحول فيما بعد الي جروب علي الفيس بوك ثم منه لمجلة فى الجامعة بدء الناس هناك فى الاهتمام فى ما اكتب ، كان ذا معني ، او ربما فى تلك الحقبة من الزمن كان ذا معني ، او ربما لاشخاص فى بداية شباب...
قراءة المزيد

فى كل عام

صورة
يحدث ان اجد نفسى محاصر  بإحساس ما اعجز عن التعبير عنه ولكن حينما احاول اعتمد على ما يشعر به من يمر بنفس اللحظة الكعبة ، الطواف ، يوم عرفه، كسوة الكعبة ، يوم العيد ، الاضحية كل مسمى من هؤلاء له مقال وحده ممكن ان تصف فيه ماشئت ولكنى احب اختصارها فى كلمات ويشعر كل انسان بقلبه فقط ولا يحتاج لان يقرأ لا يحتاج ان يظهر للعالم مدى الاحساس بالروضه والامان والقرب من الله حينها لا يحتاج ان يقول لكل ما يحب ان زد من قربك لى فأنا اليوم سعيد لا يحتاج ان تعبر ملامحه بالدموع من هيبة المشهد الذى لا يتكرر الا كل عام مرة واحدة لعل العام القادم نفقد احباباً او يقفدونا الاحباب لذلك... اعتذر عن كل شئ وعن اى شئ به شائبة من الخطأ او النسيان لاحد ونصيحتى انك لا تعيش تلك الاجواء بروح اصطناعية بروتين كل عام بل تعامل كما تجد نفسك سعيداً لشئ او حزيناً على فقدان شئ .. ولكن ليكن فى حساباتك ان الدعوة فى ذلك الوقت والتسامح والسبق بالخير قد يعطل الكثير من العقبات فى قلبك ممن الممكن ان توجد بعد ذلك ... كل عام وانتم جميــــعاً بخير.... ...
قراءة المزيد

كتاب البوابة (النسخة النهائية)...

صورة
السلام عليكم ورحمة الله .. مبدئياً بعتذر على التأخير كان المفروض الكتاب يتنشر من فتره بس مش عارف ليه ركنته شويه على جنب يمكن خوف من مجهول او مايظهرش بشكل افضل بس عموماً ..انا سبتها ع الله انجزت فيه وانتهيت من العمل وتقدروا حاليا تشوفوه اتفضلوا لينك التحميـــــل...                                            
قراءة المزيد