الاشخاص الآخريين

كان يا مكان على بر الوقت والايام 
كنت كتبت حاجات كتير ومن ضمنها رؤيتى لبعض الناس
والكلام دا فى كتاب "البوابة" اللى خلصته بقالى فتره قصيره
واللى اول ما تقرا الاسم كالعادة هاتفتكر حاجه تانيه خالص غير مضمون الكتاب
واللغز دا اتحل من خلال "المقدمة" اللى بتوضح بشكل عام اشمعنى الاسم دا بالذات
عن مليار كلمة تانيه فى العالم 
الموضوع انى عايز حاليا اذكر بعض "الحاجات" التانيه اللى مسمحش الوقت 
واللى مقدرتش انى اضمها من ضمن الحلقات ..هى حاجه حسيت انى لازم اقولها واعترف بيها 
ومالهاش علاقه بيا نهااائى انما لبعض الاشخاص الآخرييين
مين بعض الاشخاص دول وايه اللى علشانهم كتبت شئ منفصل 
بيحكى عنهم وعن علاقاتى بيهم ...استهدوا بالله كده الاول وتعالو مع بعض واحده واحده 
الاول كده "نفس عميييق " وعشان انا لسه جاى من برا دلوقت 
وكانت فى بالى الفكره من وقت مش طويل بس حبيت اقولها لوحدها ... 
الاشخاص دول اصدقائى ،اصل انا ليا ماشاء الله اصدقاء كتير 
بس كلهم وبلا منازع صفه الصداقه بتكون فى وقت حضورهم بس 
او ع النت لما بنفتح فيس وهكذا
ولان المشكله مازالت قائمه بذاتها فى ان مش بشوفهم كتير 
بس وقت ما بقابلهم بيكون معنى الصداقه متأصل ..
الاشخاص دول  بسطاء جدا فى ماكنتهم من حيث المجتمع اللى عايشين فيه
يعنى مش ماسكين حاجات مهمة او ذو القاب ومناصب 
او حياتهم ذات نفسها واللى نشأؤا فيه مش حاجه تستعظم قدرها
الحكايه دى مش عيب او تقصير فى حقهم ،انما بالعكس تماما 
دى اكتر حاجه عجبتنى فيهم واللى عشانها استريحت فى وجودهم معايا 
الشخص الاول  صديق ليا اتعرفت عليه من صديق تانى 
بمعنى انى مش صاحبته فى الاول بس من خلال تعرفى عليه 
وتكوين صورته ومع الوقت والاحداث اللى مش كتير 
قدرت انى اتكيف نفسياً معاه عن اى شخص تانى شويه
المرة دى هاقول بالاسم والعنوان لو طلبت كمان 
هو اسمه" محمد ابراهيم" ياتقريبا قدى فى السن يا اصغر حاجه بسيطه
دا ولد من النوع الممزوج بكذا حاجه مع بعض 
معندهوش "عقد" ومشاكل نفسيه ولو عنده مايبانش عليه
محمد دا بيفكرنى بصوره ممثل اجنبى مش فاكره الصراحه 
بس نموذج حياته اللى معرفش كتير عنها اوى 
بتدل على انه عايش فى الدنيا زى المغامر 
شكله وسيم ولو بالنسبالى ، ورفيع كده ولا هو طويل ولا قصير 
بس طوله وحجمه مناسبين لبعض 
هادى معظم الوقت اللى الجو بتطلب فيه هدوء 
ومشاغب برضه فى الوقت اللى طالبه فيه انه يكون كدا 
عنده روح مرحه جدا وبساطه حتى فى الكلام 
مش بيلف ولا بيدور ولا بيخبى 
حياته ظاهره للكل وتعامله مافيهوش خصوصيه لحد عن التانى 
واهم حاجه فيه انه "سالك" بيعرف يقضى اى شغله يحطّها فى دماغه 
النوع دا عاجبنى فى حاجه انه ماعندهوش دائما تعارض مع الدنيا 
انما ماشى معاها فى حدود اللى قدامه 
يمكن طموح وعايز فى المستقبل ويمكن هدفه شويه حاجات ويستقر ..الله اعلم 
بس اللى اعرفه انه مابيحطش هدف غير فى وقته 
مش بيشطح لبعيد وهو لسه مش فى امكانياته انه يعمل للهدف فى الوقت الحالى حاجه 
ممكن تلاقيه مثقف ويكلمك فى حاجات تكتشف انه بيفكر كويس فيها
ومره تانيه تلاقيه بالبلدى كده "ضاربها جزمه" ومش فارقه معاه 
هو مابيحبش الحبسه فى البيت ولا الانعزاليه البحته اللى عند حضرتى دى 
انما اجتماعى جداً وبيعرف يتعامل مع اى حد بشخصيته 
حط تحت الجمله الاخيره خطين تلاته 
لان معنى كدا انه مش بيفرق بين الناس ويصنفهم على هواه 
لو واحد انطوائى وتفكيره فى اتجاه معين يمشى معاه 
ولو واحد اجتماعى وليه فى كل حاجه برضه يمشى معاه 
ولو صايع ابن ستين "تيت" برضه يعرف يمشى معاه 
دى مهاره على فكره 
لان فكره "القفش " و "لوى البوذ" دول مش عنده 
وغير كدا هو جواه حساس بس مش بيبين الكلام دا 
يعنى بياخد فى نفسه بس مش بيركز على كدا 
انما بيعرف يعدى الموقف ومعاها بيقدّر اللى قدامه صح
فيه نزعه كدا احيانا بحسّها فى بعض البنى آدمين 
وهى لما مثلا ماتبقاش زى المطلوب بالنسباله يبدأ يعارض فيك 
او يبدأ تعامله يبقى بنوع مش بتحبه "بيصيع عليك" يعنى 
بس محمد معملش معايا الكلام دا 
يوم ما اعترض كان قالى كلمتين فى هدوء وليا انى اقتنع او ماقتنعش
مهما وصلت او قلت بيعرف يتكلم بطريقه تتقبل بيها الشئ محل النزاع 
بلاش "النزاع" عشان مش حرب احنا خليها محل" الاختلاف" حلوه الكلمه مش كدا ^_^
المهم انه تعامله بيكون بشكل عفوى ... ولو حصل انى مش عملت بكلامه
مايتغيرش عليك او يحسسك انك نزلت من نظره 
ودا عكس ناس كتير على فكره .......
محمد كنت روحت عنده من اربع او تلات سنين تقريبا ويمكن اكتر لفرح اخوه
روحت وحضرنا الفرح وعمل احلى واجب 
وزعل جدا لما اصرّيت يوميها انى اروح 
وكان عايزنى ابات ليلتها عنده وكان مرتب كل حاجه 
بس اضطريت انى امشى لظروف خاصه واعتذرت ليه
قام وصلنى لحد ما ركبت ومشيت وكان طول الطريق زعلان
ولو سألته دلوقت هايقولى برضه انه لسه زعلان ..طب ماتقلقش ياعم
ليك عليا يوم فرحك انت هبات معاك للصبح :Dها ..مرضى ياباشا ولا ايه ...^_^
محمد من الاشخاص اللى ماتدلهومش حق كبير انى اقوله كلام عنه 
هو من الناس القليلين اللى بيشجعوك تكتب وتستمر فى طريقك 
بيشجعك كده عينى عينك  مش محتاج يعنى اعمله كتاب او روايه 
او انشر حاجه محصلتش ويقولى بكومنت او شير 
انما قدامى كده وبالفم المليان 
وعشان كدا اى نقد يوجهه ليا فى يوم هاقبله وانا مبتسم 
من براا ومن جوايا برضه 
لان فيه ناس من برا آه بس من جوا
 "متشكرين يا سيدى على كلامك "من تحت الضرس كده 
عنده موهبه بالرسم بس مش الرسم بتاع اللوحات دا 
انما شئ تانى اقرب لما يعرف بالــجرافيتى.. ولمعلومه خاطفه
 )انا سألته عن اللى اسمه ايه دا  ولانى نسيت اسمه وقالى انه اسمه جرافيتى ( :D:D

عايز اقوله انك من الشخصيات المهمه اللى محطوطه فى برواز كبير 
ضمن صوره اسمها "الحياة"مش عايز فى يوم اصحى ملاقكش فيها ..فاهم ياض انت ولا مش فاهم  
انا يمكن ماقولتش حاجات كتير عنك برضه
بس يكفى مقابلتك وانى بستريح شويه معاك فى الكلام 
هو انا كان نفسى تلاقينى مشاغب زيك كده والف معاك فى كل حته 
ويبقى فيه ايام اجمل من اللى انقضت فى حياتنا
بس ماتستعجلش ..كل دا فى يوم هايحصل بإذن الله 
ودا سبب من اسباب مخليانى عندى شويه امل فى الدنيا دى 
مدام فيه اشخاص زى "محمد" موجودين ....نيجى بقه للشخصيه التانيه 
صاحبنا التالت يعرف محمد اللى اتكلمت عليه قبل منى 
وهما من بلد واحده بس مش فى نفس المكان 
اسمه "محمود يونس" الحقيقه اتغلبطت فى اسمه التانى اللى بيتعمد يلغبطنى برضه بيه
اقوم اساله فيقوم "بهزار" متوهنى ويقعد يضحك 
شويه افتكر انه محمود السيد وشويه "يونس"بس مش عارف ترتيب مين الاول قبل التانى 
المهم انى استقريت فى الاخر على الاسم اللى قولته فوق دا وخلاص 
المعلم التانى دا بقه فيه صفات متقاربه من "محمد" بمعنى انه هادى برضه ومشاغب فى نفس الوقت
طلع صايع كبير ومعرفش :Dوانا اللى كنت فاكره الحمل الوديع 
المهم بلاش نسيح ونقطع فى بعض  ،خلى الطابق مستور
المعلم دا شبه البرنس اللى مش بيحط حاجه فى دماغه تعكنن عليه
عايشها وزى ما تيجى 
شايف الدنيا ضمن مبدأ متبنيه انا شخصيا بيقول " خليها ع الله " فى دراسته وفى حياته بشكل عام 
اكبر مفاجأة ليا لما لاقيته فى الترم الاول فيه يوم  مشترك بيحضر فيه محاضراته
واللى قبليها كنت مروح بالليل ولاقيته اتصل بيا بعد فتره غياب 
اول ما سمعت صوته " محمووووود ،يابن اللذينا 
 انت فين يا بنى " وزى اللى كان مستنى واحد قريبه راجع من الحجاز ^_^
قعدت معاه اليوم لحد ما روحنا ،نتكلم ونرغى ونهيس وزى ما تحب 
مهما كنت لما اتكلم مابحسش بفرق او ان الكلام نازل من الزور 
والاكتر من كدا انى لما بحكيله بلاقى معظم الكلام طالع بشكل سلس 
اصل فيه ناس مابعرفش اقول كلمتين قدامهم على بعض 
بحس انه فيه خمستاشر شكاره اسمنت وجبس 
وضيف عليهم  نقلتين رمل  وبيختفى الكلام الى غير مسمى 
انما "محمود" بتكلم وبرغى وحتى لو مش رد عليا الرد اللى عايزه، ماتفرقش 
والله انا بسأل عليه وبدور وعايز ارجع اشوفه واقابله من جديد 
معرفش الواد فين اراضيه
اصل دماغه عاجبانى وبسيط جدا وماعندهوش يعنى العنجهه او النفخه اللى بلاقيها  
من النوع اللى مش بيبص للمظاهر على انها حاجه ضرورية عشان اقيس انسان
او اقف وافكر اتعامل معاه واصاحبه ولالا 
"محمود " عمرى ما روحت عنده ورغم انى كنت اتمنى 
بس لاحقا يمكن ان شاء الله 
عايز ادور على رقم تليفونه اللى ضاع منى تقريبا يوم ما ضاع الموبايل 
 ويا سلام لو بنمره مايعرفهاش وعلى طريقه فؤاد المهندس 
"محمووووود ،انت جيت يا حبيبى
اصل فيه واحد صاحبك عايز يكلمك فى التليفووون يا حوده  "
 :D وحشتنى آوى يا ابن اللذينا يا سهن انت يا اللى مابيبانش عليك 
وقال شكله محترم قال ، ماكلنا شكلنا محترم يا حبيبى  
يكش بس الزمن اللى بيغير فى النبى آدمين ،ولا ايه رايك يا حوووووووده ^_^

خلونى بقه افش غلى قصدى يعنى اتكلم عن الباشمهندز 
الشخصيه التالته .. عم السنجل واللى مش عايز اسيحله وهو عارف يعنى 
الحج دا معرفتى بيه مبدئيا كانت ع النت عن طريق جروب للكليه بتاعتنا
امووووت واعرف دخله وعرف طريقه منين 
ولانه مش فى الكليه بتاعتنا دا ولا فى المحافظه اصلا 
دا ساااكن بعيييييييد قرب قناة السويس كده 
وخليك عارف انى مش قصدى اسيحلك خالص ^_^
يعنى صفى النيه من جوا عشان ربنا يكرمك 
المعلم دا اسمه ومن غير تسيح برضه "محمد حسين"
مش عارف اسمه ع الفيس بوك الغريب المريب دا يطلع ايه
وكفايه بقه تسيح يا جدعان فى الراجل 
عايزنى اقول انه حاطط صوره لجيمس بوند فى فيلمه الاخير 
لا اوعوا تكونوا كمان عايزين تعرفوا ان عامل فيها عم المختفى 
ومابيرضاش يقول اسمه لحد ...
لالا يا جماعه اسمحولى كده عيب ،دا صاحبى ياناس اسيح ليه ازاى بس :D
نفسسسى مرره ادخل الفيس بوك الاقى اسمه الحقيقى مكتوب ..
هابيض يا ناس واشوف اسمه ،الواد دا ايه  ماعندوش اخوات بنات ،ماتحس يااخى ^_^
بعد كده تطور الموضوع واخدت رقم تليفونه واتكلمنا بقه واتعرفنا 
واتفقنا على معاد نتقابل فيه ، مايكونش بنحب بعض يا اخويا 
يالله ،اهو احسن من مفيش ،هو حد طايل الايام دى ،مش كده برضه ياعمم السنننجل 
لالالا كده هاخرج عن شعورى واسيح اكتر  ،يرضيكوا كده يعنى !
تعمقت صداقتى بيه رغم فارق المسافه والزمن اللى فين وفين كل ما نتقابل 
واللى عادة ما تبقى ليها مناسبه 
ومن ضمن المناسبات دى كانت فرح اخته الكبيره 
هو كان فاكرنى هاتوه ومش هاعرف اجى والجو دا بس على مين يا حبيبى 
صحيح مش عارف اماكن كتيره اوى بس لما احط فى دماغى مكان بوصله يعنى بوصله 
يوميها اتعرفت على بقيت  العائله الكريمه واخوه اللى دائما بنسى اسمه دا 
الحمد لله انى فاكره دلوقت ^_^اخوه دا طيب بشكل ماتصدقهوش ومحتاج اللى يوعيه شويه 
بس يمكن طبيعته خلت محمد يسيبه زى ماهو لان اطار حياته مش طالب اكتر من كدا 
المهم وانا فى الفرح بقه دخلت مكان ماشاء الله نادى جنب البحر 
المكان يشجع على ليله فرح تبقى زى الفل 
يعنى اللى عايز يطلع اى شحنه جواه فى رقص او غنى يديّها مايحرمهاش 
بس حصل حاجه خلت كل دا يبقى فى الخيال بس 
حاجه ماكنتش لا اتوقعها ولا فى بالى اصلا 
ولا ممكن تكون فى بال اى حد لما يسمع كلمه "فرح "
اللهم صلى على النبى لقيت ان الفرح هدوووووووء ،هُسسس خالص  
العريس ملتحى والعروسه ماشاء الله منتقبه واكتر ليله هاديه ممكن تحسّها فى حياتك 
ابتسمت ليه كدا وهو ضحك قصاد منى ،شكله فهم المفاجأة اللى  اكتشفتها دلوقت :D
بعد ما خلص الفرح على حوالى الساعه تسعه ،عمرك شفت فرح بيخلص فى الوقت دا ^_^
هو طلع معاهم فوق فى الفندق واستغيبناه انا وصاحب تانى اتعرفت عليه منه 
سألته هو بيعمل فوق كل دا ايه وماكملتش السؤال تقريبا 
ولقيت اللى بيزقه برا ،مش عايزين نشوف وشك هنا ،برااااااااااا :D
ليلتها بعد نص الليل اخدت المفاتيح ومشيت 
قالى رايح فين ؟، قلتله رايح البحر 
قالى ..دلوقتى؟!، قولتله اه منا مش هاعرف اروح بكره 
قالى انت مجنون ..قولتله وايه  يعنى ايه الجديد
ولما بعد الفجر بعد ليله طويله مع البحر 
لقيته لسه صاحى ورحت عشان اصلى الفجر ملاقتش اللى اصلى عليه
وقعدت ادور على اى حاجه عشان البلاط تلج فى الوقت دا 
رحت واخد بقه المخدات اللى ع الكراسى والكنبه وحاطهطم ع البلاط ومصلى 
بصلى وقالى .. انت ياض معلم 
قولتله ..)هههههه ، دا العادى يا بنى ،ماهو لازم اتصرف ،امال اعمل ايه يعنى ( 
محمد مشكلته انه قلبه طيب برضه زياده وبيخاطر عشان اللى بيحبه كتير 
بيخاطر لدرجه المجازفه بأمور فى حياته كانت هاتبقى افضل لو فضلت معاه
بس هو شايف ان المجازفه تستاهل رغم كل كلامى ليه
مغامر ،كل يوم فى منطقه شكل وفيه شويه غموض كده بس سرعان ما بينفقس يعنى ^_^
اصلى كل ما يكلمنى او اكلمه ع التليفون الاقيه فى منطقه شكل 
يمكن كان هو كمان متصور انى شئ واكتشف شئ تانى 
بس هو استنى وتقبل الموضوع  ودا اللى خلانى استنى معاه 
بيعرف يتحمل اى مشكله حواليه وهو ساكت 
مش بيتكلم عن ضغوطه ،بيفضل شايلها فى نفسه كده تتحل مع نفسها 
مرات معدودة اللى قابلته فيها ،بس كلها كانت بتعمل جو مختلف عن الجو اللى عايش فيه 
بشكره وبقوله انت لما جيت واتعرفت عليك ،كنت فى وقت مناسب 
كان شئ جميل انى اتعرف عليك اكتر بسرعه 
اكتر واحد دخل فى حياتى بسكل سريع وعرفته فى وقت اسرع وفى مجرد مقابلتين تلاته 
بقوله اغذرنى لانى غريب وكل شويه بطبع وبشكل ومجنون شويه فى تصرفاتى 
فاستحمل بقه اللى بخبيه عن الناس واللى ضرورى مش هلاقى حد اطلعه عليه غيرك يعنى 
قدرك ونصيبك هاعاملك ايه ، هاتنزل البادروم يعنى هاتنزل البادروم :D
دول كانوا تلاتة اشخاص اللى مش ضفتهم او ذكرهم قبل كدا 
واللى اتمنى انى اكون اديت جزء من حقهم عليا فى اللى كتبته دا 
ويوصلهم اللى جوايا ليهم شكله ايه ....
استودعكم الله ... ويالا من هنا ياض انت وهو عشان هانرش ميه ^_^